O noso centro

Historia

Corría o ano 1965. Bueu, aínda que mantendo a súa esencia, era unha vila moi distinta á que hoxe coñecemos.

Máis de mil mulleres acudían cada día ao seu posto na fábrica de conservas de Massó, mentres que a maior parte dos homes traballaban no mar durante longas tempadas. Eran tempos difíciles, e a marioría dos nenos pasaba moito tempo nas rúas durante as horas de traballo das súas nais.

Foi por esta situación polo que catro Irmás da Caridade chegaron á nosa vila co firme propósito de fundar unha escola que abrazara e formara a todos estes cativos. As Irmás tiveron un fogar onde vivir grazas á xenerosidade de María Eugenia Bolibar que cedeu desinteresadamente unha pequena casiña.

A este nobre proxecto uníronse Roberto Massó e Julita Barreras, e aínda que pasando por moitas dificultades nos trámites, o 15 de setembro de 1965 comezou a funcionar a escola na vila, tendo como primeira sala de clases un local da Sección Feminina.

Dende o inicio da actividade docente das Irmás, o interese dos nenos e mozos da vila por formar parte da escola foi en aumento, o que propiciou que ano tras ano se fosen ampliando os lugares onde se impartían clases así como a oferta de ensino.

Foi no ano 1967 cando se comezaron as obras do que hoxe é a nosa escola, nun terreo cedido e coa achega de varios préstamos, donativos e subvencións. Houbo que agardar ata 1975 para que o colexio se convertira nun Centro de E.X.B.

Dende ese ano, o centro comezou a funcionar recibindo cada vez máis alumnos e alumnas e realizando melloras que axudaron á nosa escola a adaptarse aos cambios sociais e educativos.

Hoxe, tanto as Irmás da Caridade como o equipo docente do centro continúa traballando con ilusión e amor para manter vivo un labor que se fixo realidade con moito esforzo.