A Pedagoxía Willems está baseada no principio de que a música é unha linguaxe que se ten que aprender seguindo o mesmo proceso que a da linguaxe materna; o neno imprégnase da lingua dos seus pais, que despois imita e repite, máis tarde empeza a construír frases e, finalmente, aprende a lela e a escribila.

Este método intenta conseguir unha serie de obxectivos baseados nas relacións psicolóxicas que existen entre a música, o ser humano  e a sociedade.

Como é unha sesión de estimulación musical inspirada no método Willems?

• Comezamos coa audición, pois é o inicio, o momento no que os rapaces están máis receptivos e atentos. Realízanse as actividades de maior concentración.                                                                                                           –
• En segundo lugar trabállase co ritmo que implica unha maior actividade, a través do movemento corporal. Desenvolvendo así a atención e concentración e a precisión nos seus movementos coordinados co ritmo que escoitan.
• En terceiro lugar cantamos as cancións que son o centro da clase, en importancia e en tempo, por conter todo o anterior: melodía, ritmo e harmonía. As cancións están organizadas por obxectivos pedagóxicos.
• Terminamos co movemento pois require máis esforzo físico e menos concentración mental, sen perder a atención e a escoita musical. A través de movementos naturais dos nenos asociados á música, improvisada ou gravada, desenvolvemos o sentido do tempo, do carácter, ademais de acercar aos nenos á música dos grandes mestres.

http://www.colexiovirxemilagrosa.es/?p=1512